శివోహం

నానుదుట మూడు గీతలు గీసి పంపావు...

అందరూ నన్ను వీడిపోయినా...

నీతో అనుబంధం మరింత బలపడి..

నిత్యం నీనామస్మరణకు సావకాశం పెరుగుతుంది..

నీవు మాత్రం నన్ను వీడిపోబోకుమా శివ..

మహాదేవా శంభో శరణు.. 

శివోహం

ప్రదోష తాండవ శివుడు

ఆనంద నిలయుడు

నాట్య నాయకుడు

లాస్య లావణ్యుడు

భవసాగరం దాటించు భవుడు

భావనాతీతుడు భావరమ్య రమణీయుడు

శివ, శివా

హర, హరా

మహాదేవా శంభో శరణు.

శివోహం

మనిషి నిస్సందేహంగా జపధ్యానాలు చేస్తూ ఉండాలి...

భగవత్సాక్షాత్కారాన్ని పొందడానికి భగవదనుగ్రహం ఒక్కటే మార్గం...

మరో మార్గం లేదు.

తినుబండారాలు, కూరగాయలలాగా డబ్బుపెట్టి దేవుణ్ణి కొనవచ్చుననుకున్నావా?..

భగవంతుణ్ణి పొందడానికి ఇంత జపం చేశాను ఇంత తపస్సు చేశాను అని చెప్పడానికి...

భగవంతునికి ఎవరైనా విలువ కట్టగలరా?...

ఆయన అనుగ్రహం ఉన్నప్పుడే ఆయన లభ్యమవుతాడు...

ఆయన గుమ్మం ముందు ఓపికతో వేచివున్నవారికి

భగవంతుని అనుగ్రహం కలుగుతుంది...

ఓం శివోహం... సర్వం శివమయం

శివోహం

రాశులు 12

గ్రహాలు 9

జనన సమయం లగ్నం

లగ్నాధిపతి, రాశ్యాధిపతి, గ్రహాల చెలిమి, వైరములు

ఇవేమి తెలియవు నాకు..

నాకు తెలిసింది నీమాట, నీపాట.

ఎలా ఆడిస్తే అలాగే ఆడతాను

గెలిచిన, ఓడినా నీదే భారం

నీట ముంచుతావో,పాలముంచుతావో, 

గంగలో ముంచి మోక్షమే ఇస్తావో నీపై భారం వేసా..

భరోసా ఈయవయా మహేశా...

మహాదేవా శంభో శరణు...

శివోహం

 శివా!తల త్రెంచుటలో తలపండినావు

ఏరి కూర్చి తలను ఎఱుక నొసగేవు

నా తలను త్రెంచు ఆపైన కరుణించు .

మహేశా . . . . . శరణు .

 శివా!లెక్కలేని నామాల ఒప్పియున్నావు

ఎక్కలేని శిఖరాల వసియించియున్నావు

పిలిచేదెలా నిన్ను కలిసేదెలా

మహేశా . . . . . శరణు .

శివా!బాధలను బాగించ

గుణములను గుణియించ

చేకొంటి నీ స్మరణమే

మహేశా....శరణు.

శివా!నా అపచారము మన్నించు

ఈ ఉప వాసము తప్పించు

నిజ వాసమున నిలువనుంచు

మహేశా . . . . . శరణు .

శివా!సిరివెన్నెల మాయమై నేడు

నీ సిగను చేర నేలను విడిచె

మా ఎదను మాత్రము వీడక నిలిచె

మహేశా . . . . . శరణు .

 సిరివెన్నెలను సిగ పూవును చేయ

ఏకాదశ నందులు కూడి వచ్చి

ఏకాదశ రుదృని ఎదుట నిలిపె

ఏకమైపోవగ ఎదను తెరిచె

శివార్పణం

శివా!చినుకల్లె నీ నామం చిత్తాన్ని తడపగా

వెలుగాయెను నీ నామం అజ్ఞానం తొలగించగా

మెరుగాయెను నా గమనం గమ్యాన్ని చేరగా 

మహేశా ..... శరణు.

శివా!నీ పయనం ఎప్పుడు ఎక్కడికో

నందికైనా చెప్పవేమో నాకు తెలిసి..

నంది వాహనా నీకు స్వాగతమెలా..?

మహేశా ..... శరణు.

శివోహం

శంభో...

అనుభవం నేర్పిన విజ్ఞానం తో భావములోనా, బాహ్యమునందున నిన్నే దర్శించుకుంటున్నా...

నీవే తప్ప నాకు వేరే దారి లేదు తండ్రీ...

నా చిత్తశుద్ధిని ,నిశ్చలతత్వం ను అనుగ్రహించూ పరమేశ్వర...

నీపై చిత్తమును,బ్బుద్దిని నిలిపే దృఢ సంకల్పాన్ని నాకు అనుగ్రహించు...

మహాదేవా శంభో శరణు.

శివోహం

మంచి చెడ్డలు మనిషికి చెందినవి కావు

మనసుకు చెందినవి...

వాల్మీకి, భక్తకన్నప్ప మొదలగు వారు చెడునుండి

మంచిగా మారినవారే..

మారినవారు మరల మారలేదు...

కాని...

నేను నా అవసరాలకు మంచి చెడుల నడుమ నలిగిపోతున్నా...

నన్ను ఏదారిలో నడుపుతావో శివ అంత నీ దయనే...

ఓం శివోహం... సర్వం శివమయం